काठमाडौं, असार ५ । राष्ट्रिय मानवअधिकार आयोगले नागरिकताको प्रमाणपत्रको माग गर्दै आन्दोलन गर्नेलाई नागरिकताको प्रमाणपत्र दिने व्यवस्था मिलाउन सम्बन्धित निकायलाई आग्रह गरेको छ ।
राष्ट्रिय मानवअधिकार आयोगका प्रवक्ता डा टिकाराम पोखरेलले सोमबार एक विज्ञप्ति जारी गर्दै नागरिकताको प्रमाणपत्रका लागि राजधानीको माइतीघर मण्डलामा आन्दोलन गर्नेलाई नागरिकताको अधिकारबाट वञ्चित गर्न नहुने बताए ।
राष्ट्रिय मानवअधिकार आयोगले स्थलगत अनुगमन गर्दा धर्नामा बसेका व्यक्तिले जन्मकै आधारमा नागरिकता पाउने भएकाले उनीहरूलाई नागरिकताको प्रमाणपत्र उपलब्ध गराउनुपर्ने देखियो । उनले सम्मानपूर्वक बाँच्न पाउने व्यक्तिको अधिकारसँग सम्बन्धित सबै पक्षसँग जोडिएको नागरिकताको अधिकारको सम्मान, संरक्षण र सुनिश्चितता गर्न पनि आयोगले सरकारको ध्यानाकर्षण गराएको बताए ।
साथै राष्ट्रिय मानवअधिकार आयोगले व्यक्तिको पहिचानको विषयलाई गम्भीरतापूर्वक लिन सरकारलाई आग्रह गरेको छ । आफ्नो मागप्रति सरकारको ध्यानाकर्षण गराउन २५ वर्षीय निरज कामतले असार १३ गते आत्मदाह गर्ने प्रयास गरेका थिए ।
