काठमाडौं, असार ४ । काठमाडौं उपत्यका र पोखराका हलहरुले हिन्दी फिल्मको प्रदर्शन रोकेका छन् ।
काठमाडौं महानगरका मेयर बालेन शाहले ‘आदिपुरुष’ मा समावेश ’जानकी भारतकी छोरी हुन्’ भन्ने भ्रमपूर्ण संवाद भारतबाट नहटेसम्म हिन्दी फिल्म चल्न नदिने निर्णय गरेपछि हलवालाहरुले सोमबारदेखि हिन्दी फिल्म प्रदर्शन रोकेका हुन् ।
हिजो मेयर बालेनले सोमबारदेखि महानगरमा हिन्दी फिल्म प्रदर्शनमा रोक लगाउने घोषणा गरेका थिए । उक्त निर्णय लागू गराउन महानगर प्रमुख बालेन्द्र शाहले हिजै नगर प्रहरी खटाएका थिए ।यसैगरी पोखरा महानगरपालिकाले पनि भारतीय फिल्म प्रदर्शनमा रोक लगाउने निर्णय गरेको छ ।
आदिपुरुषमा भएको त्रुटिपूर्ण संवाद नसच्चाएसम्म भारतीय फिल्म प्रदर्शनमा रोक लगाउने निर्णय महानगरपालिकाले गरेको हो ।महानगर प्रमुख धनराज आचार्यले पोखराका हलहरुलाई भारतीय फिल्म प्रसारणमा रोक लगाउन पत्र लेखेका हुन् । पत्रमा जानकी भारतीय छोरी हुन् भन्ने शब्द नसच्चिएसम्म नगर क्षेत्रभित्रका हलमा अन्य भारतीय प्रदर्शन पनि रोक्न निर्देशन दिइएको छ ।
