पशुपतिनाथ मन्दिरको सम्पत्तिको दुरुपयोग बढ्दै छ: पूर्व संस्कृति मन्त्री आले

काठमाडौं, जेठ ३२ । नेकपा (एकीकृत समाजवादी)का सांसद प्रेमबहादुर आलेले पछिल्लो समय पशुपतिनाथमा अनियमितता बढेको दाबी गरेका छन् । उनले सो क्षेत्रमा जडान गरिएका सिसिटिभी क्यामेराका तार काटेर यस्ता गैरकानुनी गतिविधि भइरहेको आरोप लगाए ।

पूर्व संस्कृति, पर्यटन तथा नागरिक उड्डयन मन्त्रीले वर्तमान संस्कृति मन्त्री सुदन किरातीले यस्ता अनियमिततालाई छानबिन गरी दोषीलाई कडा कारबाही गर्नुको सट्टा जोगाउन खोजेको आरोप लगाए ।

बिहीबार प्रतिनिधिसभाको बैठकलाई सम्बोधन गर्दै उनले पशुपति क्षेत्र विकास कोष र पशुपतिनाथ मन्दिरमा भएका यस्ता अनियमिततामा संलग्नलाई सरकारले कारबाही गर्न नसकेकोमा चिन्ता व्यक्त गरे । उनले पशुपतिनाथमा सिसिटिभी क्यामेराको तार काटेर अनियमितता गर्नेलाई कारबाही गर्न माग गरे ।

गोठाटारमा सार्वजनिक जग्गा हिनामिना भएको पनि आलेको दाबी छ । गोठाटारको ५ सय ३५ रोपनी जग्गामध्ये ३१ रोपनी बिचौलियाको मिलेमतोमा हिनामिना भएको आरोप छ ।

उनले काभ्रेपलाञ्चोक जिल्लामा हेलिप्याड निर्माण गर्न मन्त्रालयले दिएको स्वीकृति संविधानविपरीत भएको बताए ।