भक्तपुर, जेठ १८ । नेपाल मजदुर किसान पार्टीले राष्ट्रपति रामचन्द्र पौडेलले नागरिकता विधेयकको प्रमाणीकरण र नेपालको लुम्बिनी र कपिलबस्तु गाभेर तयार गरेको भारतको नक्सा तत्काल खारेज गर्न माग गरेको छ ।
पार्टी सचिव प्रेम सुवालले बिहीबार प्रेस विज्ञप्ति जारी गर्दै नागरिकता विधेयकको विरोध र आलोचना गरेका हुन् ।
पार्टी अध्यक्ष नारायणमान बिजुक्छेको अध्यक्षतामा बिहीबार बसेको पार्टीको केन्द्रीय सचिवालयको बैठकले राष्ट्रविरोधी नागरिकता विधेयकको प्रमाणीकरणविरुद्ध प्रेस विज्ञप्ति जारी गर्ने निर्णय गरेको हो ।
विज्ञप्तिमा ‘संसदको अनुमतिबिना तत्कालीन राष्ट्रपति विद्यादेवी भण्डारीले अस्विकार गरेको वर्तमान राष्ट्रपति रामचन्द्र पौडेलले ‘नेपाल नागरिकता ऐन, २०६३ लाई संशोधन गर्न बनेको विधेयक’ प्रमाणीकरण गर्नु संसदको सर्वोच्चता र संसदीय परम्परा विरुद्धको हो ।” भनि उल्लेख गरेको छ ।
विज्ञप्तिमा पूर्व राष्ट्रपतिले अस्वीकृत गरेको विधेयक संसदको अनुमतिबिना मान्य मान्न नसकिने उल्लेख छ । ‘२०७२ असोज ३ गते अघि जन्मको आधारमा नेपाली नागरिकता पाएका विदेशीका सन्तान र विदेशी नागरिकसँग विवाह गरेका नेपाली महिलाबाट जन्मेका विदेशीका सन्तानलाई वंशजका आधारमा नेपाली नागरिकता दिने विधेयकको व्यवस्था नेपालीको हितमा छैन । ’ विज्ञप्तिमा भनिएको छ ।
नेपालको लुम्बिनी र कपिलवस्तुलाई समेटेर भारतीय विस्तारवादअन्तर्गत तयार पारिएको नक्सा नेपालको सार्वभौमसत्ता र भौगोलिक अखण्डतामा भारतीय विस्तारवादको हस्तक्षेप भएको भन्दै गत जेठ १४ गते भारतको संसद भवनमा राखेको पार्टीले विरोध गरेको थियो । विज्ञप्तिमा भनिएको छ, ‘नेपाल मजदुर किसान पार्टी भारतीय विस्तारवादको यो हस्तक्षेपको विरोध र निन्दा गर्दछ ।
‘भारतको यो नयाँ नक्सा खारेज गर्न पुष्पकमल दाहाल नेतृत्वको गठबन्धन सरकारले ल्याउनु जरुरी छ । यो नक्सा खारेज नभएसम्म देशभक्त नेपाली जनताले भारतीय विस्तारवाद विरुद्ध संघर्ष जारी राख्ने विज्ञप्तिमा उल्लेख छ ।
