काठमाडौं, वैशाख १३ । अर्जेन्टिनी फरवार्ड भ्यालेन्टिन कास्टेलानोसको ह्याट्रिकसहित चार गोल मद्दतमा जिरोनाले स्पेनिस ला लिगामा रियल म्याड्रिडलाई पराजित गरेको छ ।
जिरोनाले घरेलु मैदानमा रियलमाथि ४–२ को जित निकालेको हो । रियलका भिनिसियस जुनियर र लुकास भास्क्वेजले गोल गरेपनि हार टार्न सकेन ।
जिरोनासँगको हारसँगै रियल म्याड्रिडको उपाधि जित्ने सम्भावना लगभग सकिएको छ । ला लिगामा अब ७ चरणको खेल बाँकी रहँदा रियल शीर्षस्थानको क्याटलान क्लब बार्सिलोनासँग ११ अंकले पछि छ । बार्सिलोनाले अझै एक खेल कम खेलेको छ ।
रियलको ३१ खेलबाट ६५ अंक छ । एक खेल कम खेलेको बार्सिलोनाको ७६ अंक छ । रियललाई हराएको जिरोना ३१ खेलबाट ४१ अंक जोडेर नवौं स्थानमा उक्लिएको छ ।
