काठमाडौं, वैशाख ७ । आर्थिक संकटमा परेको नेपाल वायुसेवा निगमले कर्मचारी सञ्चय कोष र नागरिक लगानी कोषसँग ब्याज, क्षतिपूर्ति र जरिवाना मिनाहा गर्न अनुरोध गरेको छ ।
कोभिड–१९ को महामारीका कारण व्यवसायमा प्रतिकूल असर परेकाले सो अवधिको ब्याज, क्षतिपूर्ति र जरिवाना मिनाहा गरी सहयोग गर्न निगमले अनुरोध गरेको छ । गत असार मसान्तसम्म कर्जाबापत रु दुई अर्ब ९४२८ करोड तिरेको निगमले कर्मचारी सञ्चय कोष र नागरिक लगानी कोषलाई पनि किस्ताको सङ्ख्या बढाउन र ऋण भुक्तानीमा सहजीकरण गर्न अनुरोध गरेको छ ।
निगमका प्रवक्ता रमेश पौडेलले आज जारी गरेको विज्ञप्तिमा निगमको अनुरोधमा इपीएफ र सिआइटीसँग छलफल भइरहेको उल्लेख छ ।
वर्तमान नेतृत्वले व्यवस्थापन सम्हालेपछि निगमको व्यवसाय विस्तार र नगद प्रवाहमा क्रमिक सुधार भएको निगमले जनाएको छ । त्यसैले अन्तर्राष्ट्रिय उडानका लागि दुई न्यारो बडी र दुई वाइड बडी जहाज ऋणमा खरिद गरिएको हो । ऋणको किस्ताबापत ५३ करोड ९५ लाख ५० हजार रुपैयाँ चैत १३ गते भुक्तानी गरिएको थियो ।
