काठमाडौं, वैशाख ४ । सरकारले श्री पशुपति हिन्दू विश्वविद्यालय स्थापनाको प्रक्रिया अघि बढाएको छ ।
संस्कृति, पर्यटन तथा नागरिक उड्डयन मन्त्रालयले हिन्दू धर्मबारे अनुसन्धान गर्ने उद्देश्यले विश्वविद्यालय स्थापना गर्न लागेको हो ।
यसका लागि सम्भाव्यता अध्ययन गर्न मन्त्रालयले गठन गरेको समितिले अध्ययनको निष्कर्षसहितको अवधारणापत्र संस्कृति, पर्यटन तथा नागरिक उड्डयनमन्त्री सुदन किरातीलाई बुझाएको थियो । समितिका संयोजक तथा सांस्कृतिक विज्ञ डा जगमान गुरुङले आइतबार मन्त्री किरातीलाई उक्त अवधारणापत्र हस्तान्तरण गरेका हुन् ।
मन्त्री किरातीले समयसापेक्ष कन्सेप्ट नोटको प्रशंसा गर्दै यसलाई छिट्टै कार्यान्वयनमा ल्याउने विश्वास व्यक्त गरे । प्रस्तावित विश्वविद्यालयको विस्तृत प्रतिवेदन तयार गर्न मन्त्रालयले छुट्टै समिति गठन गर्ने किरातीले बताए ।
समिति गठन भएको एक महिनाभित्र अवधारणापत्र तयार पारेको थियो । विश्वविद्यालयले हिन्दू धर्मको बारेमा व्यापक अनुसन्धान गर्न, हिन्दू धर्मका विज्ञ उत्पादन गर्न र सांस्कृतिक कूटनीतिको विकासमा पनि सहयोग गर्ने विश्वास छ ।
विश्वविद्यालयले नेपाललाई विश्वकै आध्यात्मिक आकर्षणको केन्द्रका रूपमा स्थापित गर्न सहयोग पुग्नेमा डा गुरुङ विश्वस्त थिए ।
