चितवन, वैशाख ४ । देशभरका स्थानीय तहका लागि ठूलो चुनौती बनेको रत्ननगर नगरपालिकाले फोहोर व्यवस्थापनमा उदाहरणीय कार्य गरेको छ ।
देशका सबै स्थानीय तहलाई उछिन्दै नगरपालिकाले फोहोर व्यवस्थापनमा उत्कृष्ट अवार्ड हात पारेको छ ।
नेपाल नगरपालिका संघले युनाइटेड सिटीज लोकल गभर्नमेन्ट एसिया प्यासिफिकसँगको सहकार्यमा वातावरण तथा जनस्वास्थ्य संस्थानको प्राविधिक सहयोगमा तरल मल मल व्यवस्थापनसम्बन्धी नीति वकालत कार्यक्रम सञ्चालन गर्दै आएको छ ।
कार्यक्रमलाई प्रभावकारी रुपमा सञ्चालन गरेकोमा रत्ननगर नगरपालिकाले ५ हजार अमेरिकी डलर नगद पुरस्कार प्राप्त गरेको छ ।
युनाइटेड सिटीज लोकल गभर्नमेन्ट एसिया-प्यासिफिक बिल एण्ड मेलिन्डा गेट्स फाउन्डेसनद्वारा सञ्चालित अन्तर्राष्ट्रिय संस्था हो। यसले वातावरण संरक्षण र सरसफाईको क्षेत्रमा काम गर्दै आएको छ ।
निर्वाचित जनप्रतिनिधिले कार्यभार सम्हाल्नुअघि नै फोहोर व्यवस्थापनका लागि नगरपालिकाले वार्षिक रु एक करोडदेखि रु एक करोड २५ लाखसम्मको बजेट खर्च गरेको नगरपालिकाका इन्जिनियर पंकज गिरीले बताए ।
निर्वाचित जनप्रतिनिधि आएपछि निजी क्षेत्रसँगको सहकार्यमा फोहोर व्यवस्थापन गरिएको हो । यो पद्धतिबाट नगरपालिकाले वार्षिक ४२ लाख आम्दानी गर्दै आएको छ ।
नगरपालिकाले फोहोर सङ्कलनमा निजी क्षेत्रलाई नलागेको, फोहोर व्यवस्थापनका लागि जनचेतनामूलक कार्यक्रम समेत गरेको उनले बताए ।
प्लाष्टिकजन्य पदार्थ उन्मूलनका लागि वातावरणमैत्री अभियान सञ्चालन भइरहेका छन् । सौराहालगायत विभिन्न क्षेत्रमा सञ्चालित होटलमा प्लाष्टिकको प्रयोग नियन्त्रण गर्न नगरपालिकाले कडाइ गरेको छ ।
रत्ननगरका मेयर प्रल्हाद सापकोटाले नगरपालिकाले सार्वजनिक स्थानमा प्लाष्टिक फाल्न निषेध गरेको बताए । बजार क्षेत्रको मानव मलमूत्र व्यवस्थापन गर्न नगरपालिकाको वडा नं ४ मा प्रशोधन केन्द्र निर्माण गरिएको उनले बताए ।
‘रत्ननगरलाई सफा, हरियाली र सुन्दर बनाउने प्रयासमा छौं,’ उनले नगरपालिकावासीको सहयोगमा अभियानले गति लिएको बताए ।