काठमाडौँ, चैत २३ । थ्री स्टार क्लबले सहिद स्मारक ‘ए’ डिभिजन लिगमा विभागीय त्रिभुवन आर्मी फुटबल क्लबलाई पराजित गरेको छ । थ्री स्टारले आर्मीमाथि १–० को जित निकालेको हो । च्यासल रंगशालामा बिहीबार भएको खेलमा थ्री स्टारको जितमा पहिलो हाफमा अजायी मार्टिन्सले गरेको गोल नै निर्णायक बन्यो ।
उनले १७औं मिनेटमा कप्तान विक्रम लामाको थ्रु बलमा अफसाइड बिट ट्याप गर्दै वान भर्सेस वानको स्थितिमा सुन्दर फिनिस गर्न सफल भएका थिए ।
जारी लिगमा उनको यो चौथो गोल हो । उनी सर्वाधिक गोलकर्ताको दौडमा सातदोबाटोका दीपक राज सिंह ठकुरी भन्दा एक गोलले पछि छ।
एक गोलको अग्रता लिएको थ्री स्टारले त्यसलाई जोगाउँदै महत्वपूर्ण जित निकाल्न सफल भयो । थ्री स्टारकाे याे तेस्राे जित हाे । यता, एक गोलले पछि परेको आर्मीले थ्री स्टारलाई लगातार दवावमा राखेपनि गोल गर्न नसक्दा यो सिजन लिगमा दोस्रो हार बेहोर्न पुग्यो ।
यस जितसँगै थ्री स्टार ६ खेलबाट १० अंक जोडेर छैटौं स्थानमा उक्लिएको छ । पराजित आर्मी ८ अंक जोडेर आठौं स्थानमा छ ।
Published Date: 06 April 2023
