काठमाडौं, चैत २१ । स्वास्थ्य तथा जनसङ्ख्या मन्त्रालयले कोरोना भाइरसको लक्षण देखिएपछि तत्काल आइसोलेसनमा बस्न सबैलाई अनुरोध गरेको छ ।
मन्त्रालयले एक सूचना जारी गर्दै लक्षण देखिए लगत्तै कोरोना परीक्षणका लागि गएर सबैलाई आइसोलेसनमा बस्न आग्रह गरेको छ । अन्यथा प्रमाणित नभएसम्म हरेक सामान्य रुघाखोकी, ज्वरो कोभिड-१९ हुनसक्ने भएकाले सावधानी अपनाउन अनुरोध गरेको छ ।
कोरोनाभाइरसको नयाँ संस्करण – Omicron – XBB। 1.16 – नेपालमा पहिलो पटक पुष्टि भएको छ। यो नयाँ भेरियन्टका कारण अहिले भारतलगायत छिमेकी मुलुकमा कोरोनाको संक्रमण बढ्दै गएको छ ।
कोभिड–१९ बढ्दै गएकाले यसको रोकथाम र नियन्त्रणका लागि समाजका सबै क्षेत्रलाई प्रभावकारी भूमिका खेल्न पनि मन्त्रालयले आग्रह गरेको छ । यसले कोभिड–१९ पूर्ण रूपमा नियन्त्रणमा नआएकाले स्वास्थ्य नियमावली पालना गर्न र कोभिड–१९ विरुद्धको खोप लगाउन सबैलाई अनुरोध गरेको छ ।
शून्यमा झरेको कोरोना संक्रमण अहिले फेरि बढ्न थालेको छ । अप्रिल ३ मा मात्रै ७६ जनामा कोरोना संक्रमण भेटिएको थियो र हालसम्म सक्रिय कोरोना संक्रमितको संख्या २२७ पुगेको छ ।
मन्त्रालयले कोरोना भाइरसबाट सुरक्षित रहन सबैलाई अनुहारको मास्कको उचित प्रयोग गर्न, कोभिड–१९ विरुद्धको खोप लगाउन, साबुन पानीले हात धुने र बारम्बार सेनिटाइजर प्रयोग गर्न र सामाजिक दूरी कायम गर्न आग्रह गरेको छ ।
