काठमाडौं, चैत १६ । राष्ट्रियसभाको आजको बैठकमा राष्ट्रिय मानवअधिकार आयोगलगायत विभिन्न आयोगको वार्षिक प्रतिवेदन प्रस्तुत गरिएको छ ।
सो अवसरमा प्रधानमन्त्री पुष्पकमल दाहाल ‘प्रचण्ड’का तर्फबाट सञ्चार तथा सूचना प्रविधिमन्त्री रेखा शर्माले वार्षिक प्रतिवेदन प्रस्तुत गरेकी थिईन्।
बैठकमा थारु आयोगको चौथो वार्षिक प्रतिवेदन २०२२/२३, राष्ट्रिय समावेशी आयोगको चौथो वार्षिक प्रतिवेदन २०२२/२३, राष्ट्रिय मानवअधिकार आयोगको वार्षिक प्रतिवेदन २०२२/२३ र आदिवासी जनजाति आयोगको तेस्रो वार्षिक प्रतिवेदन २०२२/२३ प्रस्तुत गरिएको थियो ।
बैठकले ‘राष्ट्रिय प्रोटोकल विधेयक–२०७९’ लाई दफावार छलफलका लागि विधायन व्यवस्थापन समितिमा पठाएको छ ।
राष्ट्रियसभाको बैठकले विधेयकलाई दफावार छलफलका लागि व्यवस्थापिका व्यवस्थापन समितिमा पठाउन सांसद डा बेदुराम भुसालले प्रस्तुत गरेको प्रस्तावलाई सर्वसम्मतिले पारित गरेको हो ।
राष्ट्रियसभाको अर्को बैठक चैत २१ गते बस्नेछ ।
Published Date: 30 March 2023
