काठमाडौं, चैत १३ । उपप्रधानमन्त्री एवम् भौतिक पूर्वाधार तथा यातायातमन्त्री नारायणकाजी श्रेष्ठले सवारी साधनमा नेपाली भाषा इम्बोस्ड नम्बर प्लेट जडान गर्ने कार्ययोजना अघि बढाइएको बताएका छन् । मन्त्रालयमा आयोजित पत्रकार सम्मेलनमा मन्त्री श्रेष्ठले यसका लागि सम्बन्धित निकायसँग छलफल गरिरहेको बताए ।
यसबारे प्रधानमन्त्रीसँग पनि छलफल भएको र यो कार्ययोजनाअनुसार कामलाई तीव्रता दिइएको उनले बताए ।
“यहाँ अनौठो छ, इम्बोस्ड नम्बर प्लेट पढ्ने प्रविधि छैन,” उनले भने।
मन्त्री श्रेष्ठले इम्बोस्ड नम्बर प्लेट जडान गर्दा लिने शुल्क घटाउन गृहकार्य भइरहेको बताए । एजेन्सीबाट प्राप्त रकमअनुसार शुल्क लिनुपर्ने उनको भनाइ छ ।
‘इम्बोस्ड नम्बर प्लेट जडान गर्दा लाग्ने शुल्क घटाउन सकिने विषयमा छलफल भएको छ,’ उनले भने । मन्त्री श्रेष्ठले सवारीसाधनको फिटनेस परीक्षण र हरियो स्टिकरका लागि लाइनमा उभिनुपर्ने अवस्था हटाउने व्यवस्था मिलाइएको पनि बताए । यसका लागि सूचना प्रविधिको प्रयोग गरिने मन्त्री श्रेष्ठले बताए ।
