काठमाडौं, चैत ८ । जनता समाजवादी पार्टी (जसपा)ले आगामी वैशाख १० गते हुने उपनिर्वाचनबारे छलफल गर्न पार्टी कार्यसमितिको बैठक बोलाएको छ ।
बुधबार दिउँसो १ बजे पार्टी कार्यालय बालकुमारीमा कार्यसमितिको बैठक बोलाइएको जसपा कार्यसमिति सदस्य शिवलाल थापाले जानकारी दिए ।
आजको बैठकमा प्रतिनिधिसभाअन्तर्गतका तीन निर्वाचन क्षेत्रमा हुने उपनिर्वाचनका लागि पार्टीको उम्मेदवारको विषयमा छलफल हुने बताइएको छ । वैशाख १० गते हुने उपनिर्वाचनका लागि उम्मेदवारी दर्ता गर्ने कार्यतालिका तय भएको छ ।
जसपा अध्यक्ष उपेन्द्र यादवले बारा क्षेत्र नं १ बाट उपनिर्वाचनमा प्रतिस्पर्धा गर्ने बताइएको छ ।
त्यसैगरी कार्यसमितिको बैठकमा मन्त्रिपरिषद् र व्यवस्थापिकाको बैठकमा पार्टीको सहभागिताका विषयमा पनि छलफल हुनेछ । जसपाले सरकारमा सहभागी हुने निर्णय गरिसकेको भए पनि कसलाई मन्त्री बनाउने र पार्टीबाट कति जनालाई सरकारमा पठाउने भन्ने विषयमा पनि पार्टीले छलफल गर्नेछ ।
