काठमाडौं, चैत ८ । सानिमा र रिलायन्स लाइफ इन्सुरेन्सको बिहीबार (चैत ९ गते) देखि सेयर कारोबार रोक्का हुने भएको छ । दुवै कम्पनीले सेयर कारोबार रोक्का गरिदिन आग्रह गर्दै नेपाल स्टक एक्सचेन्ज (नेप्से) लाई पत्र पठाएका छन् । यता, सानिमा र रिलायन्स लाइफ इन्सुरेन्स एक आपसमा मर्ज भएर बिहीबार (चैत ९ गते) बाट एकीकृत कारोबार सुरु हुँदैछ ।
तसर्थ, सेयर मिलान, धितोपत्र पुनः दर्ता, धितोपत्रको अभौतिकीकरण तथा सूचीकरण प्रयोजनका लागि सेयर कारोबार रोक्का गरिदिन दुवै कम्पनीले आग्रह गरेका हुन् ।
दुवै कम्पनीलाई एकीकृत कारोबार गर्न बिमा प्रधिकरणले फागुन १८ गते र कम्पनी रजिष्ट्रार कार्यालयले फागुन २९ गते अन्तिम स्वीकृति दिइसकेको छ । दुवै एक भएपछि अब सानिमा रिलायन्स लाइफ इन्सुरेन्सको नामबाट एकीकृत कारोबार हुनेछ ।
बिमा प्राधिकरणले सानिमा र रिलायन्स लाइफलाई (१ः१) सेयर अनुपातमा मर्ज हुन स्वीकृति दिएको हो । यो सँगै दुई कम्पनीको मर्जर प्रकृया अघि बढेको हो । यस्तै, दुवै कम्पनीको फागुन १२ गते बसेको साधारण सभाले मर्ज हुने प्रस्ताव पारित गरिसकेको छ ।
हाल सानिमाको चुक्ता पुँजी २ अर्ब रुपैयाँ छ र रिलायन्स लाइफको चुक्ता पुँजी २ अर्ब १० करोड रुपैयाँ छ ।
