काठमाडौं, चैत ७ । सरकारले विद्यालय शिक्षा क्षेत्रका कार्यक्रमका लागि युरोपेली संघबाट ५ करोड युरो अनुदान सहायता स्वीकार गर्ने निर्णय गरेको छ ।
सोमबार बसेको मन्त्रिपरिषद्को बैठकले कृषि तथा पशुपन्छी विकास मन्त्रालयमार्फत किसानलाई दिँदै आएको रासायनिक मलमा अनुदानको दर घटाउने पनि निर्णयलाई कार्यान्वयन नगर्ने निर्णय गरेको हो ।
सरकारले नेपाल र बंगलादेशबीच ‘रियल टाइम हाइड्रो–मेटियोरोलोजिकल डाटा आदानप्रदान’ सम्बन्धी समझदारी पत्रमा हस्ताक्षर गरेको हो ।
त्यस्तै सरकारले नेपाल प्रहरीको अतिरिक्त महानिरीक्षक (एआइजी) मा वसन्तबहादुर कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्यलाई बढुवा गर्ने निर्णय गरेको छ ।
प्रमाणित अयोग्य माओवादी लडाकुहरूलाई राहत सहयोग उपलब्ध गराउने निर्णय पनि गरियो। मन्त्रिपरिषद्को बैठकले नेपाल वन निगम लिमिटेडको प्रमुख कार्यकारी अधिकृतमा मानबहादुर खड्कालाई नियुक्त गर्ने निर्णय गरेको छ ।
