काठमाडौं, फागुन १९ । प्रधानमन्त्री पुष्पकमल दाहालले नेपाल आयुर्वेदका लागि उपयुक्त ठाउँ भएको बताउँदै आयुर्वेदको प्रवद्र्धनलाई प्राथमिकतामा राखेर काम गर्नुपर्नेमा जोड दिएका छन् ।
काठमाडौंमा सातौं अन्तर्राष्ट्रिय आयुर्वेद महासभालाई सम्बोधन गर्दै प्रधानमन्त्री दाहालले जलवायु परिवर्तनका कारण आयुर्वेदका लागि उपयुक्त नेपालजस्ता प्राकृतिक गन्तव्यमा विभिन्न किसिमका समस्या आएको र त्यसलाई न्यूनीकरण गर्नेतर्फ लाग्नुपर्ने बताए ।
उनले नेपाल आयुर्वेद क्षेत्रका लागि प्राकृतिक भूमि भएको उल्लेख गर्दै नेपालमा यार्सागुम्बा, अमला, रुद्राक्ष, तुलसी जस्ता महत्वपूर्ण औषधीय वनस्पति पाइने उल्लेख गरे ।
प्रधानमन्त्रीले आयुर्वेदको विकासका लागि नेपालमा वनस्पति संरक्षणमा जोड दिँदै सरकारले यसलाई उच्च प्राथमिकतामा राखेको बताए । सिंहदरबारमा वैद्यखाना स्थापना गर्ने जस्ता सरकारका प्रयासहरू आयुर्वेदको संरक्षण र प्रवद्र्धनका लागि हुन्।
उनले भारतले नेपाललाई आयुर्वेदिक औषधिको प्राथमिक स्रोतका रूपमा मान्यता दिएको भन्दै नेपालको वनस्पति संरक्षण गर्नुपर्ने आवश्यकता औंल्याए । साथै उनले नेपालमा पाइने बिरुवाहरुको अध्ययन र अनुसन्धान गर्नुपर्नेमा जोड दिए ।
प्रधानमन्त्री दाहालले महासभामा जलवायु परिवर्तन र त्यसको असर न्यूनीकरणका उपायबारे छलफल हुनेमा आफू विश्वस्त रहेको बताए।
