काठमाडौं, फागुन १८ । एमाले रास्ट्रपति उम्मेदवार सुवासचन्द्र नेम्वाङले आज अन्य दलका शीर्ष नेताहरुसँग भेटेर भोट माग्ने भएका छन् । उनले नेकपा (एकीकृत समाजवादी), राष्ट्रिय स्वतन्त्र पार्टी (रासपा) र राष्ट्रिय प्रजातन्त्र पार्टी (राप्रपा)का नेताहरुलाई व्यक्तिगत रुपमा भेटेर भोट हाल्न आग्रह गर्ने तयारी गरेको बताइएको छ ।
उनले बिहान ११ बजे नेकपा (एकीकृत समाजवादी)का अध्यक्ष माधवकुमार नेपालसँग भेट गरेको थियो। भेटमा नेम्वाङसँगै विष्णु पौडेल र पृथ्वीसुब्बा गुरुङ पनि सहभागी थिए।
त्यसैगरी, उनले दिउँसो १ बजे रास्वपा अध्यक्ष रवि लामिछानेसँग भेट गर्नेछन् । बैठकमा नेम्वाङसँगै योगेश भट्टराईलगायत नेताहरुको सहभागिता रहनेछ ।
त्यसैगरी दिउँसो २ः३० बजे उनले राप्रपाका अध्यक्ष राजेन्द्र लिङ्देनलाई भेटेर राष्ट्रपतिका लागि राप्रपाको मत माग्ने छन् । रास्वपा र राप्रपाले राष्ट्रपतिको निर्वाचनमा कसलाई भोट दिने भन्ने घोषणा गरेका छैनन् ।
नेकपा (एकीकृत समाजवादी) ले आठ दलीय गठबन्धनका उम्मेदवार नेपाली काँग्रेसका नेता रामचन्द्र पौडेललाई समर्थन गरेको सार्वजनिक गरेको छ । यसअघि नेकपा एमालेको सचिवालय बैठकले नेपाली काँग्रेसबाहेक सबै दललाई पत्र पठाएर भोट मागेको थियो ।
आफ्नो पार्टीले भोटका लागि अन्य दललाई पत्र लेखे पनि नेम्वाङले अन्य दलका नेताहरूसँग व्यक्तिगत रूपमा भेटेर भोट माग्ने तयारी गरेका छन् ।
