काठमाडौं, फागुन १८ । हालै बनेको आठ दलीय गठबन्धनका प्रतिनिधिसभा र राष्ट्रियसभा सदस्यको राष्ट्रपतिको निर्वाचन सम्बन्धी अभिमुखीकरण सत्र आज बस्दैछ ।
एक गठबन्धन साझेदार नेपाली कांग्रेसको समन्वय र व्यवस्थापनमा बैठक दिउँसो १ बजे काठमाडौंको तिनकुनेस्थित शाही भोजमा बस्ने कांग्रेसका मुख्य सचिव कृष्णप्रसाद पौडेलले जानकारी दिए । अभिमुखीकरण सत्रमा कांग्रेस, माओवादी केन्द्र, जनता समाजवादी पार्टी, एकीकृत समाजवादी, लोकतान्त्रिक समाजवादी पार्टी, जनता पार्टी, राष्ट्रिय जनमोर्चा र नागरिक उन्मुक्ति पार्टीका आठ दलका सांसद सहभागी हुने उनले बताए ।
बैठकलाई गठबन्धनका शीर्ष नेताहरूले सम्बोधन गर्दै राष्ट्रपति निर्वाचनमा गठबन्धनका उम्मेदवार रामचन्द्र पौडेललाई भोट गर्न सांसदहरूलाई आग्रह गर्ने कार्यक्रम छ ।
आठ दलीय गठबन्धनको समर्थनमा पौडेलले राष्ट्रपति पदमा उम्मेदवारी दिएका छन् । त्यस्तै, नेकपा एमालेले पार्टी उपाध्यक्ष सुवासचन्द्र नेम्वाङलाई उम्मेदवार बनाएको छ । राष्ट्रपतिको निर्वाचन फागुन २५ गते हुँदैछ ।
Published Date: 02 March 2023
