म्याग्दी, साउन १७ । राष्ट्रिय गौरवको कालीगण्डकी करिडोरअन्तर्गत बेनी–जोमसोम सडकखण्डमा पहिरो नियन्त्रणसँगै सडक स्तरोन्नतिको काम तीव्र पारिएको छ।
बेनी–जोमसोम–कोरला सडक आयोजनाले गलेश्वर–वैँसरी र वैँसरी–रातोपानी खण्डमा सडक फराकिलो बनाउने, ढलान गर्ने, ग्याबिन जाली तथा पक्की पर्खाल निर्माण गर्ने काम अघि बढाएको हो।
गलेश्वर–वैँसरी खण्डका लागि गुरुङ शङ्करश्री क्रियटिभ जेभीसँग रु. ७ करोड ३० लाख र वैँसरी–रातोपानी खण्डका लागि कालीमाता–थापाकाजी–रासुवा जेभीसँग रु. ८ करोडमा ठेक्का सम्झौता भएको छ।
दुवै खण्डमा गरी करिब ३ किलोमिटरभन्दा बढी सडक ढलान तथा विभिन्न स्थानमा ग्याबिन, प्लम र कङ्क्रिट पर्खाल निर्माण गरिने आयोजनाले जनाएको छ। भीरकाटेमा विस्फोटक पदार्थ प्रयोग गरी पहरा फुटाएर सडक फराकिलो बनाउने कामसमेत भइरहेको छ।
कमजोर भूबनोटका कारण बर्खायाममा बाढीपहिरोले यातायात अवरुद्ध हुने समस्या रहेकाले पहिरो नियन्त्रण र सडक संरक्षणलाई प्राथमिकता दिइएको आयोजनाले जनाएको छ।
