काठमाडौं, साउन १५ । प्रधानमन्त्री वालेन्द्र शाहले सुनसरीलगायत जिल्लामा उत्पन्न संवेदनशील परिस्थितिलाई नियन्त्रणमा लिन र सामाजिक सद्भाव कायम गर्न सरकार योजनाबद्ध रूपमा अघि बढिरहेको बताएका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा आज मधेश प्रदेशबाट प्रतिनिधित्व गर्ने राष्ट्रिय स्वतन्त्र पार्टी (रास्वपा)का सांसदहरूसँग भएको छलफलमा प्रधानमन्त्री शाहले राज्यका सबै अंग उच्च सतर्कतामा रहेको जानकारी दिए।
उनले नागरिकलाई संयमित रहन र कुनै पनि किसिमको अफवाह तथा उत्तेजनाबाट प्रभावित नहुन आग्रह गरे। सरकारको प्राथमिकता पीडित नागरिकसम्म पुग्ने, उनीहरूलाई सुरक्षित महसुस गराउने, घटनाको निष्पक्ष छानबिन गर्ने र थप गलत गतिविधि हुन नदिने रहेको उनले स्पष्ट पारे।
प्रधानमन्त्री शाहले रास्वपा सांसदहरूलाई पनि आ–आफ्नो निर्वाचन क्षेत्रमा पुगेर जनतासँग प्रत्यक्ष संवाद गर्न आग्रह गरे। थप हिंसा फैलिन नदिन, पीडित तथा प्रभावित नागरिकको दुःख–सुखमा साथ दिन र राज्य तथा नागरिकबीच विश्वासको वातावरण निर्माण गर्न उनले सांसदहरूलाई आग्रह गरेका छन्।
सरकारले संवेदनशील जिल्लाको अवस्था सामान्य बनाउन सुरक्षा निकाय, प्रशासन र राजनीतिक नेतृत्वबीच समन्वयलाई प्राथमिकता दिएको जनाएको छ।
Published Date: 31 July 2026
