काठमाडौँ, असार १७ । काठमाडौं उपत्यकाका अधिकांश पेट्रोलपम्प आज बन्द रहेपछि सर्वसाधारणले इन्धन अभावको समस्या भोग्नुपरेको छ। गएराती पेट्रोलियम पदार्थको मूल्य घटेपछि नै आज “पेट्रोल छैन”भन्ने बोर्ड राखेर पम्पहरु बन्द भएका हुन्।
ठूलो परिमाणमा इन्धन भण्डारण गर्ने र मूल्य घट्ने निर्णय भएपछि नेपाल आयल निगमबाट नयाँ आपूर्ति नल्याउने प्रवृत्ति दोहोरिएको भन्दै उपभोक्ताले गम्भीर असन्तुष्टि व्यक्त गरेका छन्।
उपभोक्ता अधिकारकर्मीहरूका अनुसार यस्तो कार्यले कृत्रिम अभाव सिर्जना गरी उपभोक्तालाई प्रत्यक्ष रूपमा मर्कामा पार्ने भएकाले यसलाई उपभोक्ता हितविपरीतको गतिविधि मान्न सकिन्छ। यस्तो गतिविधिमा संलग्न व्यक्ति तथा संस्थामाथि निष्पक्ष छानबिन गरी आवश्यक कानुनी कारबाही गर्नुपर्ने माग पनि उठेको छ।
यसैबीच, पेट्रोलपम्प सञ्चालकहरूले जानाजानी आपूर्ति रोकेका हुन् वा होइनन् भन्ने विषयमा सम्बन्धित निकायले छानबिन गर्नुपर्ने आवाज बलियो बन्दै गएको छ।
उपभोक्ताले प्रश्न उठाएका छन्—यदि कृत्रिम अभाव सिर्जना गरिएको हो भने त्यसमा संलग्न कर्मचारी र पेट्रोलपम्प सञ्चालकमाथि के कारबाही हुन्छ?
