काठमाडौं, असार १ । राष्ट्रिय प्रजातन्त्र पार्टीका सांसद ज्ञानेन्द्र शाहीले भौतिक पूर्वाधार मन्त्री सुनिल लम्सालको ‘खुट्टा भाँच्ने’ अभिव्यक्तिलाई लिएर भइरहेको आलोचनाप्रति आफ्नो धारणा सार्वजनिक गरेका छन्।
सामाजिक सञ्जाल फेसबुकमार्फत प्रतिक्रिया दिँदै शाहीले उक्त अभिव्यक्तिको आशय हिंसा प्रवर्द्धन गर्नु नभई कानुन मिच्ने, लापरवाही गर्ने र जनताको काममा बेवास्ता गर्ने प्रवृत्तिविरुद्ध कडा सन्देश दिनु रहेको बताएका छन्।
उनले जनताको सेवामा बसेर आफ्नो जिम्मेवारी पूरा नगर्ने, काममा ढिलासुस्ती गर्ने तथा राज्यको प्रणालीलाई कमजोर बनाउनेहरूलाई कानुनी दायरामा ल्याई कडा कारबाही गर्नुपर्ने उल्लेख गरेका छन्। जनताले परिणाम चाहेको भन्दै उनले बहाना र गैरजिम्मेवारीलाई अब सहन नसकिने बताएका छन्।
शाहीले अनुशासन, जवाफदेहिता र परिणाममुखी कार्यसंस्कृति स्थापित नगरी सुशासन सम्भव नहुने जिकिर गर्दै जिम्मेवारीबाट भाग्नेहरूलाई संरक्षण होइन, कानुनअनुसार उत्तरदायी बनाउने समय आएको बताएका छन्।
