काठमाडौं, वैशाख १६ । संसद् छल्दै अध्यादेश ल्याएको आरोपमा सरकारको चौतर्फी आलोचना भइरहेका बेला राष्ट्रिय स्वतन्त्र पार्टी (रास्वपा)ले भने यस कदमलाई आवश्यक सुधारका रूपमा व्याख्या गरेको छ।
रास्वपाले विगतमा भएका अनावश्यक दलियकरण तथा गलत नियुक्तिहरू नसच्याएसम्म जनताले सरकारबाट अपेक्षा गरेको परिणाम प्राप्त हुन नसक्ने दाबी गरेको छ। पार्टीका अनुसार अहिलेको अध्यादेश त्यसै प्रकारका विकृतिहरू अन्त्य गर्ने उद्देश्यसहित ल्याइएको हो।
रास्वपाले जारी गरेको धारणा अनुसार, “पहिले अध्यादेश दल फुटाउन वा विपक्षीलाई थुन्न ल्याइने अभ्यास थियो। अहिलेको अभ्यास कसैलाई दुख दिन वा कसैलाई सुविधा दिन होइन, आवश्यक सुधारका लागि हो। यो कदम कानुनी दायराभित्र रहेर गरिएको अभ्यास हो।”
सरकारको कदमप्रति विपक्षी दलहरूले भने निरन्तर विरोध जनाइरहेका छन्। उनीहरूले संसद् प्रक्रियालाई कमजोर बनाउने गरी अध्यादेश ल्याइएको आरोप लगाएका छन्।
यद्यपि, रास्वपाको समर्थनसँगै अध्यादेशको औचित्य र प्रभावबारे राजनीतिक बहस अझ तीव्र हुने देखिएको छ।
