काठमाडौँ, चैत २७ । सवारीचालक अनुमतिपत्र (लाइसेन्स) छपाइ प्रक्रिया तीव्र पारिएको छ। विगतमा दैनिक ५–६ हजार मात्र छापिँदै आएको लाइसेन्स हाल दैनिक करिब ४० हजार प्रति छापिन थालेको छ।
सुरक्षण मुद्रण केन्द्रले बिहान ७ देखि दिउँसो ३ र दिउँसो ३ देखि बिहान १ बजेसम्म दुई सिफ्टमा काम सुरु गरेको जनाएको छ। सञ्चार तथा सूचना प्रविधिमन्त्री डा. विक्रम तिमिल्सिनाको निर्देशनपछि छपाइमा तीव्रता आएको हो।
हाल छाप्न बाँकी करिब २९ लाख लाइसेन्स २०८३ असार मसान्तसम्म सम्पन्न गर्ने लक्ष्य राखिएको छ। छापिएका लाइसेन्स हुलाकमार्फत देशभरका यातायात कार्यालयमा पठाइने र सेवाग्राहीले आफ्नो लाइसेन्सको अवस्था विभागको वेबसाइटबाट हेर्न सक्ने व्यवस्था गरिएको छ।
