काठमाडौं, चैत ५ । भोलि चैत्र ६ गते शुक्रबार र पर्सि ७ गते शनिबार देशका विभिन्न भागमा भारी वर्षा, हिमपात तथा तीव्र हावाहुरी आउने सम्भावना रहेको पूर्वानुमान गरिएको छ। मौसममा आउने यस आकस्मिक परिवर्तनका कारण सर्वसाधारणलाई सतर्कता अपनाउन सम्बन्धित निकायले आग्रह गरेको छ।
प्राधिकरणले अत्यावश्यक कामबाहेक यात्रा नगर्न, हावाहुरी चल्दा घरका झ्यालढोका मजबुत रूपमा बन्द गर्न तथा आगलागी हुन सक्ने स्रोतहरू बन्द गर्न अनुरोध गरेको छ। सवारी साधन चलाइरहेको अवस्थामा सुरक्षित स्थानमा रोकेर बस्न र भीडभाडमा हुँदा नआत्तिई शान्त रूपमा सुरक्षित स्थानतर्फ सर्न पनि सुझाव दिइएको छ।
त्यसैगरी, हावाहुरीको समयमा कमजोर संरचना, अग्ला रुख, टेलिफोन तथा बिजुलीका खम्बा र तारमुनि नबस्न विशेष आग्रह गरिएको छ। यदि कतै बिजुलीको तार लत्रिएको अवस्थामा देखिएमा त्यसलाई नछुन र सो समयमा विद्युतीय उपकरण प्रयोग नगर्न पनि सर्वसाधारणलाई सचेत गराइएको छ।
जोखिमयुक्त स्थानमा बसोबास गर्ने वा आवतजावत गर्नेहरूलाई विशेष सावधानी अपनाउन अनुरोध गर्दै प्राधिकरणले आपतकालीन अवस्थामा ‘हेलो गृह मन्त्रालय’ मार्फत सम्पर्क गर्न समेत आग्रह गरेको छ।
सम्बन्धित निकायले सम्भावित जोखिम न्यूनीकरणका लागि सबैलाई सजग र जिम्मेवार बन्न अपिल गरेको छ।
