काठमाडौँ, चैत ३ । साताको तेस्रो दिन मंगलबार सेयरबजार परिसूचक नेप्सेमा दोहोरो अंकको सुधार आएको छ । मंगलबार नेप्से १३.५१ अंकले बढेर २ हजार ८१२.३४ विन्दुमा कायम भएको हो । आज सेयरबजारमा ३४० कम्पनीका सेयर कारोबार भएका छन् । यी मध्ये १३२ कम्पनीका सेयरमूल्य बढेका छन् भने ११३ कम्पनीका सेयरमूल्यमा गिरावट आएको छ ।
आज सेयरबजारमा ३ करोड ४८ लाख ५२ हजार ७६० कित्ता सेयर १२ अर्ब ३ करोड ४४ लाख ६ हजार रुपैयाँमा किनबेच भएको छ । कारोबार रकम सोमबारको तुलनामा ०.५० प्रतिशतको वृद्धि हो । आज सेयरबजारमा सूचीकृत समूहमध्ये वाणिज्य बैंक, विकास बैंक, जलविद्युत, लगानी, उत्पादनशील तथा प्रसोधन र म्युचुअल फण्ड समूहको परिसूचक सकारात्मक रहेका छन् ।
सबैभन्दा धेरै जलविद्युत समूहको परिसूचक १.५९ प्रतिशतले बढेको छ । यस्तै, वित्त, होटेल तथा पर्यटन, जीवन बीमा, निर्जीवन बीमा, लघुवित्त, अन्य तथा व्यापार समूहको परिसूचकमा भने गिरावट आएको छ । रिलायन्स् स्पिनिङ मिल्स्, सोलु हाइड्रोपावर लिमिटेड तथा सालपा विकास बैंकका सेयरधनीले सबैभन्दा बढी कमाएका छन् ।
सबैभन्दा बढी गुमाउनेमा भने एनआईसी एसिया ग्रोथ फण्ड, ग्लोवल आइएमई समुन्नत योजना तथा सनराईज फस्ट म्युचुअल फण्डका लगानीकर्ता रहेका छन् ।
