काठमाडौं, फागुन ९ । देशको कानुन व्यवसायीहरुको छाता संगठन नेपाल बार एसोसिएसनले लामो समयदेखि रिक्त रहेको प्रधानन्यायाधीशको पदमा छिटोभन्दा छिटो नियुक्ति गर्न सरकारसँग माग गरेको छ ।
प्रधानमन्त्रीको सरकारी निवास बालुवाटारमा आज प्रधानमन्त्री पुष्पकमल दाहालसँग एनबीए अध्यक्ष गोपालकृष्ण घिमिरेको नेतृत्वको प्रतिनिधिमण्डलले भेट गरी प्रधानन्यायाधीश नियुक्तिका लागि पहल गर्न माग गरेको हो ।
लामो समयदेखि सर्वोच्च अदालतमा प्रधानन्यायाधीश र अन्य न्यायाधीशको पद रिक्त रहेकाले न्याय सम्पादन प्रभावित भएकाले तत्काल प्रधानन्यायाधीश नियुक्तिको टुंगो लगाउन प्रधानमन्त्रीको ध्यानाकर्षण गराएको घिमिरेले बताए ।
प्रधानन्यायाधीश र सर्वोच्च अदालतका अन्य न्यायाधीशको नियुक्ति गर्ने संवैधानिक परिषद्को अध्यक्षमा प्रधानमन्त्रीले काम गर्ने संवैधानिक व्यवस्था छ । सर्वोच्च अदालतमा प्रधानन्यायाधीशको पद २०२२ फेब्रुअरी १३ देखि रिक्त छ ।
प्रधानमन्त्रीसँगको भेटमा एनबीए अध्यक्ष घिमिरे, महासचिव अञ्जिता खनाल, वाग्मती प्रदेश उपाध्यक्ष हर्क रावल, वरिष्ठ अधिवक्ता कृष्णप्रसाद भण्डारीलगायतको सहभागिता थियो ।
