काठमाडौं, फागुन ९ । प्रधानमन्त्री पुष्पकमल दाहालले विगत दुई वर्षदेखि साउदी अरबको जेलमा रहेका नेपाली दिनेश कार्कीलाई नेपाल फर्काउन पहल गर्ने प्रतिबद्धता व्यक्त गरेका छन् ।
धनकुटाको चौबिसे गाउँपालिका–४ का दिनेश ट्राफिक नियम उल्लंघन गरेको अभियोगमा साउदी कारागारमा छन् ।
प्रधानमन्त्रीको सरकारी निवास बालुवाटारमा आज बिहान दिनेशका बुबा गणेशबहादुर कार्कीसहितको टोलीसँगको भेटमा प्रधानमन्त्री दाहालले दिनेशलाई नेपाल फिर्ता ल्याउने प्रतिबद्धता जनाएका हुन् ।
प्रधानमन्त्रीले दिनेशलाई साउदी जेलबाट रिहा गरी तत्काल स्वदेश फर्काउन पहल गर्न परराष्ट्र मन्त्रालयको ध्यानाकर्षण गराए ।
‘विदेशमा रहेका नेपाली कामदारको अधिकार र सुरक्षाप्रति वर्तमान सरकार अत्यन्तै संवेदनशील छ । विदेशमा रहेका नेपालीहरुको राष्ट्रिय अर्थतन्त्रमा महत्वपूर्ण योगदान रहेको छ । त्यसैले उनीहरुको हित र सुरक्षाको प्रबन्ध गर्नु राज्यको दायित्व हो,’ प्रधानमन्त्रीले भने ।
प्रधानमन्त्री दाहालले भने, “वैदेशिक रोजगारीमा रहेका नेपालीको आत्मसम्मान कायम राख्नका साथै उनीहरुको पूँजी, सीप र प्रविधिलाई नेपालको हितमा परिचालन गर्न सरकार प्रतिबद्ध छ ।”
