भक्तपुर, फागुन ७ । अरनिको राजमार्गअन्तर्गत सूर्यविनायक-धुलिखेल सडक चार लेनमा विस्तार हुने भएको छ । भक्तपुरको सूर्यविनायक देखि धुलिखेलसम्मको सडक ३ वर्षमा सक्नेगरी ठेक्का सम्झौता भएको हो ।
सडक निर्माण अन्तर्गत काभ्रेपलाञ्चोकको साँगा देखि धुलिखेलसम्मको ८.४ किलोमिटर सडकखण्ड पहिलो चरण र भक्तपुरको सूर्यविनायक देखि काभ्रेपलाञ्चोकको साँगासम्मको ७.५ किलोमिटर सडकखण्ड दोस्रो चरणमा सक्नेगरी छुट्टाछुट्टै दुई चरणमा सम्झौता भइसकेको जनाएको छ ।
सूर्यविनायक–धुलिखेल, धुलिखेल–सिन्धुली–बर्दिबास सडक आयोजना कार्यालयले सडकको बीचबाट दायाँबायाँ २५/२५ मिटरको मापदण्डनुसार राजमार्गअन्तर्गत पर्ने चार नगरलाई पत्राचार गरी लगत सङ्कलन कार्यमा सहयोग गर्न अपिलसमेत गरेको जनाएको छ ।
उक्त साँगा देखि धुलिखेल सडकखण्डको ठेक्का लामा कन्स्ट्रक्सनले पाएको छ भने दोस्रो चरणमा निर्माण गरिने सूर्यविनायक–साँगा सडकखण्डको ठेक्का आशिष कुमार श्रेष्ठ/बन्धन भगवती जेभीसँग सम्झौता भइसकेको विभागले जनाएको छ ।
Published Date: 19 February 2023
