काठमाडौं, फागुन ७ । नेकपा एमालेको प्रदेश कमिटीले पार्टीका केन्द्रीय सदस्य दुर्गा प्रसाईंलाई कारबाही गर्न केन्द्रलाई सिफारिस गरेको छ ।
एमाले स्थायी कमिटी सदस्य तथा प्रदेश इन्चार्ज राजेन्द्र गौतमले शनिबार बिहान बसेको प्रदेश कमिटीको पूर्ण बैठकले पार्टीको हित विपरीतका गतिविधि गरेको भन्दै प्रसाईलाई कारबाही गर्न केन्द्रलाई सिफारिस गरेको बताए ।
‘प्रदेश कमिटी सदस्य भएकाले यहाँबाट कारबाही गर्न नसकेकाले केन्द्रमा सिफारिस गरेका छौं,’ गौतमले भने ।
केही समयदेखि पार्टी हित विपरीत गतिविधि गर्दै आएका प्रसाईलाई पार्टीबाट निष्कासन गर्नुपर्ने पार्टीका सदस्यहरुले जोड दिएपछि कारबाहीका लागि केन्द्रमा सिफारिस गरिएको उनले बताए ।
एमालेको नीति र सिद्धान्त विपरीत उनी केही दिनअघि पूर्वराजा ज्ञानेन्द्र शाह र उनका छोरा पारसलाई कार्यक्रममा आयोजना गरेको भन्दै विवादमा परेका थिए ।
चिकित्सा व्यवसायी समेत रहेका प्रसाईले धर्म र राष्ट्रियता जोगाउने अभियान सुरु गरेका छन् । उनले गत सोमबार काँकडभिट्टाबाट ‘राष्ट्र, राष्ट्रियता, धर्म, संस्कृति र नागरिक बचाऔं महाअभियान’ शुरु गरेका हुन् ।
