रौतहट, असोज ५ । तरकारी ओसार्ने गाडीबाट प्रहरीले ठूलो मात्रामा लागुऔषध गाँजा बरामद गरेको छ । शनिबार साँझ करिब साढे सात बजेतिर रौतहटको इशनाथ नगरपालिका-८ मोतिपुर सडक खण्डमा चेकजाँचका क्रममा प्रहरीले तरकारी बोकेको गाडीबाट गाँजा बरामद गरेको हो ।
प्रदेश–३–०१–०२२ च १८६१ नम्बरको पिकअप भ्यानलाई प्रहरी चौकी रामपुरखापको टोलीले चेकजाँज गर्दा ३ सय ३४ केजी गाँजा बरामद भएको हो ।
तरकारी बोकेको सो भ्यानको माथिल्लो भागमा २० बोरा फूलकाउली देखिने गरी राखिएको तर त्यसको तल २६ पोका गाँजा लुकाइएको अवस्थामा फेला परेको डीएसपी राजु कार्कीले बताए । गस्ती टोलीलाई देखेपछि चालक गाडी छोडेर फरार भएका थिए ।
बरामद गाँजा मध्ये १५ केजी तौलका १९ पोका र ७ केजी तौलका ७ पोका गरी जम्मा ३ सय ३४ केजी रहेको छ । प्रहरीका अनुसार गाँजासहितको भ्यान नियन्त्रणमा लिएर फरार चालक र संलग्न तस्करको खोजी कार्य भइरहेको डीएसपी कार्कीले बताए ।
Published Date: 21 September 2025
