काठमाडौँ, भदौ १५ । नेपाल इट्टा उद्योग महासंघको सत्रौँ साधारण सभा तथा छैठौं राष्ट्रिय अधिवेशनले कृष्णप्रसाद अवाललाई आगामी कार्यकालका लागि राष्ट्रिय अध्यक्षमा निर्विरोध चयन गरेको छ। भक्तपुरका उद्योगी अवाल लामो समयदेखि इट्टा उद्योग व्यवसायमा संलग्न रहँदै आएका छन्।
अध्यक्षमा निर्वाचित भएपछि अवालले महासंघलाई थप सबल र प्रभावकारी बनाउन आफ्नो नेतृत्व केन्द्रित गर्ने बताएका छन्। इट्टा उद्योगसँग सम्बन्धित नीतिगत सुधार, पर्यावरणमैत्री उत्पादन प्रणालीको प्रवर्द्धन, श्रमिकको अधिकार संरक्षण तथा उद्योगी व्यवसायीको हितमा आवश्यक पहल गर्ने योजनासमेत प्रस्तुत गरेका छन्।
नेपाल इट्टा उद्योग महासंघले देशभरका इट्टा उद्योग व्यवसायीहरूलाई एकीकृत गर्दै उनीहरूको समस्या समाधान, नीतिगत संवाद तथा व्यवसायिक सहज वातावरण निर्माण गर्ने उद्देश्य लिएको छ। यस अधिवेशनले नेतृत्व चयनसँगै संगठनलाई थप गतिशील बनाउने ठोस कार्ययोजना अघि बढाउने निर्णय गरेको छ।
अध्यक्षमा निर्वाचित भएका अवाललाई उद्योगी, व्यवसायी तथा विभिन्न क्षेत्रबाट बधाई तथा सफल कार्यकालको शुभकामना व्यक्त गरिएको छ।
