मुम्बई, असार ९ । बलिउडको चर्चित कमेडी फ्रेन्चाइज फिल्म ‘हेरा फेरी’ बाट अभिनेता परेश रावलको बाहिरिएको खबरले फिल्म उद्योग र प्रशंसकहरूलाई स्तब्ध बनाएको छ । हालै अभिनेता अक्षय कुमारले यसबारे सार्वजनिक रूपमा प्रतिक्रिया दिएका छन् र परिस्थितिलाई लिएर आशावादी धारणा व्यक्त गरेका छन् ।
पछिल्लो महिनामा परेश रावलले आधिकारिक रूपमा ‘हेरा फेरी–३’ मा नखेल्ने घोषणा गरेपछि यो विषय विवादको केन्द्रबिन्दुमा आएको हो । निर्देशक प्रियदर्शनसँगको रचनात्मक मतभेदका कारण रावलले फिल्म छाड्ने निर्णय गरेको सुरुवाती रिपोर्टहरूमा भनिएको थियो तर पछि दुबै पक्षले त्यो दावी अस्वीकार गरे ।
परेश रावलको ‘बाबुराव’ पात्र ‘हेरा फेरी’ फ्रेन्चाइजको प्राण मानिन्छ । त्यसैले, उनको अनुपस्थितिमा फिल्मको प्रभाव र आत्मा हराउने डर धेरै दर्शकहरूमा देखिएको छ । निर्माता, निर्देशक र सह–कलाकारहरू पनि यो खबरपछि स्तब्ध बनेका थिए ।
हालै भारतीय मिडियासँगको अन्तर्वार्तामा अक्षय कुमारले यो विषयमा बोलेका छन् । उनले भनेका छन्– ‘जे हुँदैछ, त्यो तपाईंको सामु छ। मैले औंलाहरू क्रस गरेर राखेको छु । मलाई आशा छ सबै कुरा ठीक हुनेछ र त्यो निश्चित रूपमा हुनेछ ।’
उनको यो अभिव्यक्तिले दर्शकहरूमा फेरि एक पटक आशाको किरण देखाएको छ, शायद फिल्म टिमबीचको दूरी मेटिएला र बाबुराव फेरि पर्दामा फर्किने छन् ।
