काठमाडौं, फागुन २२ । अब एउटा खाताबाट एकभन्दा बढी कार्ड जारी गर्न नपाइने भएको छ । नेपाल राष्ट्र बैंकको भुक्तानी विभागले बुधबार भुक्तानी प्रणाली सम्बन्धी एकीकृत निर्देशन जारी गर्दै उक्त व्यवस्था गरेको हो ।
‘प्राकृतिक व्यक्तिको एउटा खाताबाट एकै प्रकृति (डेविट/क्रेडिट/प्रिपेड) को एक भन्दा बढी कार्ड जारी गर्न पाइने छैन । तर, डोमेस्टिक कार्ड स्किमअन्तर्गतका कार्डहरु जारी गर्दा यो व्यवस्थाले बाधा पुर्याएको मानिने छैन’ भुक्तानी प्रणाली सम्बन्धी एकीकृत निर्देशनमा भनिएको छ ।
त्यस्तै ग्राहकले मोबाइल बैंकिङ तथा इन्टरनेट बैंकिङ प्रणाली सञ्चालन वा कारोबार गर्दा ‘भीपीएन’ प्रयोग गरे नगरेको पहिचान गरी आधिकारिक भीपीएन प्रयोग नभएमा एपमा लगइन गर्न नमिल्ने व्यवस्था संस्थाहरुले मिलाउनुपर्ने छ ।
भुक्तानी सम्बन्धी कार्य गर्ने संस्थाले भुक्तानी सम्बन्धी कार्यका लागि प्रयोग हुने विभिन्न प्रणालीको अब नियमित रुपमा डीसी डीआर ड्रिल गर्नुपर्नेछ । त्यस्तै, नेपाल राष्ट्र बैंकले अनस्ट्रक्चरेड सप्लिमेन्ट्री सर्भिस डाटा वा असंरचित अतिरिक्त सेवा डाटा (युएसएसडी) प्रणालीमार्फत हुने भुक्तानी कारोबारको सीमा दैनिक १० हजार रुपैयाँ र प्रतिकारोबार ५ हजार हुनुपर्ने व्यवस्था गरिएको छ । यो नयाँ व्यवस्था हो ।