काठमाडौं, मंसिर २७ । नेपाल प्रिमियर लिग अन्तर्गत आज भएको दोस्रो खेलमा जनकपुरले काठमाडौं गुर्खाजलाई पराजित गरेको छ । त्रिवि क्रिकेट मैदानमा भएको खेलमा काठमाडौलाई ५ विकेटले पराजित गर्दै जनकपुर प्लेअफमा पुगेको हो । जनकपुर प्लेअफमा पुग्ने पहिलो टोली हो ।
टस जितेर पहिले ब्याटिङ गरेको काठमाडौं गुर्खाजले जनकपुरलाई १०२ रनको लक्ष्य दिएको थियो । जनकपुरले मात्रै ५ विकेटको क्षतिमा १६ औं ओभरको अन्तिम बल अघि नै लक्ष्य पूरा गरेको हो । ६ खेलमा ५ मा विजय हात पार्दै जनकपुरले प्लेअफमा स्थान निश्चित गरेको हो । अन्तिम खेलमा चितवन राइनोजलाई पराजित गरेमा जनकपुरको क्वालिफायर्स १ मा पक्का गर्नेछ । जनकपुरले १ सय २ रनको लक्ष्य १५.५ ओभरमा १ सय ४ रन बनाउँदै पूरा गरेको थियो । हर्ष ठाकर २५ बल खेलि समान १ चौका र छक्का प्रहार गर्दै २५ र मोहम्मद मोहसिन ७ बलमा ३ चौका प्रहार गरी १३ रनमा अविजित रहे ।
लाहिरु मिलान्था २० बलमा २ चौका प्रहार गरी १६, आसिफ शेख २, कप्तान अनिल साह ११ र शुभ कंसाकार ५ रन बनाई आउट भए । जनकपुरबाट जिम्मी निशमले सर्वाधिक २७ रन बनाए । उनले १ चौका र ३ छक्का प्रहार गरे । जनकपुर जितको नजिक पुग्दा उनलाई जेहरार्ड इरसमसले एलबीडब्लु आउट गरे । गुर्खाजबाट करण केसीले ३ ओभरमा १० रन खर्चेर २ तथा इरसमस, दीपेश कँडेल र शाहव आलमले १–१ विकेट लिए ।
यसअघि टस जितेर ब्याटिङ गरेको गुर्खाज १९.३ ओभर खेलि १ सय १ रनमा अलआउट भयो । ललित राजवंशी र शेर मल्लले ३–३ विकेट लिए । एकै ओभरमा स्टेफन इस्किनाजी र सुमित महर्जनलाई आउट गरेका ललितले ४ ओभरमा २ मेडन राख्दै ८ रन खर्चे । तल्लोक्रममा २ विकेट लिएका शेरले ३.३ ओभरमा ११ रन खर्चे । मोहसिनले ४ ओभरमा २० रन खर्चेर २ तथा किशोर महतो र अरनिको यादवले १–१ विकेट लिए ।
इरसमसले गुर्खाजबाट सर्वाधिक २० रन बनाए । उनले २२ बल खेली २ चौका प्रहार गरे । करणले १३ बल खेलि २ चौका र १ छक्काका साथ १९, स्टेफन इस्किनाजीले १९ बल खेली २ चौकासहित १७ रन बनाए । माइकल लेभिट ८, भीम सार्की ४, रशिद खान ७, ड्यान डाउथवेट १, प्रतिक श्रेष्ठ ६ रनमा आउट भए । शाहव ८ रनमा अविजित रहे । गुर्खाजको ५ खेलमा यो तेस्रो हार हो । टोलीले २ खेल जितेको छ । आफ्नो अन्तिम २ खेलमा विजय हात पारेमा गुर्खाजको प्लेअफ पुग्ने सम्भावना रहन्छ ।
