काठमाडौं, मंसिर १८ । यूएईमा जारी यु–१९ एसिया कप क्रिकेटमा नेपालले आफ्नो अन्तिम खेलमा अफगानिस्तानमाथि रोमाञ्चक एक विकेटको जित निकाल्दै सान्त्वना सफलता हात पारेको छ ।
आज (मंगलबार) को खेलमा अफगानिस्तानले टस जितेर ब्याटिङ रोजेपछि ३५.४ ओभरमै १२३ रनमा अलआउट भयो। जवाफमा नेपाली टोलीले ४१.३ ओभरमा ९ विकेटको क्षतिमा लक्ष्य पूरा गर्दै जीत दर्ता गर्यो । नेपाली टोलीका लागि नरेन साउदले २६ रनको महत्वपूर्ण योगदान दिए भने कप्तान हेमन्त धामीले अविजित रहँदै २२ रन बनाए। अर्जुन कुमालले २१ रन जोडे भने अविषेक तिवारीले १३ रन थपे ।
बलिङतर्फ नेपालका युनिस ठकुरी उत्कृष्ट रहे । उनले १० ओभरमा तीन मेडन राख्दै २४ रन खर्चेर तीन विकेट लिए । सन्तोष यादवले पनि तीन विकेट हात पारे भने हेमन्त धामी र अविषेक तिवारीले दुई–दुई विकेट लिए ।
अफगानिस्तानका लागि फैसल खानले ५२ रनको योगदान दिए पनि अन्य ब्याटरले उनलाई पर्याप्त साथ दिन सकेनन् । नेपालले प्रतियोगितामा यसअघि श्रीलंका र बंगलादेशसँग पराजित भई उपाधि होडबाट बाहिरिएको थियो । यो जितले भने नेपाली टोलीलाई सकारात्मक अन्त्य गर्न मद्दत पुर्याएको छ ।
Published Date: 03 December 2024
