काठमाडौँ, कार्तिक ४ । जिल्ला अदालत कास्कीले राष्ट्रिय स्वतन्त्र पार्टी (रास्वपा) का सभापति रवि लामिछानेमाथि अनुसन्धान गर्न प्रहरीलाई ६ दिनको म्याद दिएको छ । सूचना अधिकारी सुरज अधिकारीकाअनुसार लामिाछानेमाथि अनुसन्धान गर्न ६ दिनको म्याद दिइएको हो ।
न्यायाधीश नवराज दाहालको इजलासले उनीमाथि अनुसन्धान गर्न समय दिएको हो । सहकारी ठगी प्रकरणमा लामिछाने शुक्रबार पक्राउ परेका हुन् । रविमाथि अनुसन्धान गर्न प्रहरीले मंगलबारसम्मका लागि म्याद पाउने छन् । सूर्यदर्शन सहकारी ठगी प्रकरणमै पक्राउ परेका रविका पूर्व साझेदार छविलाल जोशी पनि कास्की प्रहरीकै हिरासतमा छन् ।
उनलाई पनि प्रहरीले मंगलबारसम्मका लागि म्याद थप गरेको छ । अब बुधबार रवि र छविलाई एकसाथ पहिलो पटक अदालत उपस्थित गराइनेछ । रवि पक्राउको विरोधमा रास्वपाका समर्थकहरूले पोखरामा प्रदर्शन जारी राखेका छन् । समर्थक र प्रहरीबीच धकेलाधकेल समेत भएको थियो । प्रहरीले स्थिति नियन्त्रणमा लिनका लागि पानीको फोहोरा र अश्रुग्यास प्रहार गरेको थियो । पोखराको सडकमा समर्थक र प्रहरीको बाक्लो उपस्थिति छ ।
