नयाँदिल्ली, असोज २९ । वायु प्रदुषण नियन्त्रणका लागि नयाँदिल्लीमा आतिशबाजी गर्न प्रतिबन्ध लगाउने जानकारी त्यहाँको प्रशासनले गराएको छ ।
यो प्रतिबन्ध दीपावलीका समय भारतीयहरुका लागि अत्याधिक लोकप्रिय रहेको पटाकाको प्रयोगमा यसअघि लगाइएका प्रतिबन्धहरुको श्रृंखलामध्ये कडा आदेश हो ।
भारतीय प्रशासनले सुरक्षा र प्रदूषणलाई ध्यानमा राख्दै यसअघि पनि आतिशबाजीको प्रयोगमा रोक लगाउने प्रयास गरेको भएपनि व्यापक रुपमा उल्लंघन हुने गरेको छ ।
दिल्ली प्रदूषण नियन्त्रण समितिले एक वित्रप्ति जारी गर्दै भनेको छ, “सबै प्रकारका पटाका पड्काउन, उत्पादन, भण्डारण र बिक्री गर्न पूर्ण प्रतिबन्ध लगाइनेछ ।”यो निर्देशन ‘उच्च वायु प्रदूषण नियन्त्रण गर्न सार्वजनिक हित’ लाई ध्यानमा राख्दै गरिएको समितिले जनाएको छ ।
यो निर्णय झिलीमिली बत्ती बाल्दै पटाका पड्काएर भारत बर्षमा मनाउने हिन्दूहरुको अति लोकप्रिय चाडमध्ये एक दिपावलीको दुई हप्ताअघि आएको हो । धेरैले आतिशबाजीलाई उत्सवको अभिन्न अंगको रुपमा लिन्छन् ।
यो पर्व अन्धकारमाथि प्रकाशको विजयको प्रतीक हो र हिन्दू देवी लक्ष्मीको आराधना गरिने उत्सव हो । करिब तीन करोड जनसंख्या रहेको महानगरमा यसअघि लगाइएको प्रतिबन्धलाई नियमित रुपमा बेवास्ता गरिएको थियो ।
हिन्दू धर्मावलम्बीको पटाकासँग जोडिएको धार्मिक भावनालाई ध्यानमा राख्दै प्रहरीले नियम उल्लंघन गर्नेलाई कारबाही गर्न आनाकानी गर्ने गरेको छ । नयाँदिल्लीमा हरेक शरद ऋतुमा धुवाँ र धुलोका कारण बढी प्रदूषित हुनेगरेको छ ।
नयाँदिल्लीले शहरमा प्रदूषण बढ्नुको कारण मुख्यतया छिमेकी क्षेत्रका किषानहरुले छापो पोल्नु (पराली जलाउनु) पनि भएको बताउने गरेको छ । दीपावली (दिवाली) को आसपास आतिशबाजीमा वृद्धिले प्रदूषणको समस्यालाई जटिल बनाउँछ ।
फोक्सोको माध्यमबाट रक्तप्रवाहमा प्रवेश गर्ने पीएम २.५ प्रदूषकको रुपमा चिनिने क्यान्सर पैदा गर्ने सूक्ष्म कणहरुको स्तर नयाँदिल्लीमा विश्व स्वास्थ्य संगठनको खतरा सीमाभन्दा ३० गुणा बढीसम्म हुने गर्छ ।
सन् २०२० मा ल्यान्सेटको एक रिपोर्टअनुसार वायु प्रदूषणका कारण सन् २०१९ मा दिल्लीमा करिब १७ हजार ५०० जनाको मृत्यु भएको थियो ।विगतमा, आतिशबाजी राज्यको सीमा पार गरेर तस्करी गरिन्थ्यो वा लुकीछिपी उपलब्ध हुन्थे ।
शहरमा प्रशासनले पटाकाको प्रयोगमा कडाई गरेपछि मध्यरात वा बिहान सबेरै सुरक्षाकर्मीको आँखा छलेर पट्काइन्थ्यो । तर यस वर्ष, दिल्लीका शहरका अधिकारीहरुले राज्य प्रहरीलाई प्रतिबन्ध लागू गर्न आग्रह गर्दै उनीहरुलाई ‘दैनिक कार्यप्रगति रिपोर्ट’ पेश गर्न निर्देशन दिएका छन् ।
यो प्रतिबन्ध सन् २०२४ को अन्त्यसम्म जारी रहनेछ । – एएफपी
