काठमाडौँ, भदौ ११ । स्पेनिस ला लिगामा सोमवार प्रतिस्पर्धात्मक खेलमा भिल्लारियलले सेल्टा भिगोलाई पराजित गरेको छ। इन्ज्युरी समयको दसौं मिनेटमा ड्यानि परेजोले गोल गरेपछि भिल्लारियलले ४-३ को जित निकालेको हो।
घरेलु मैदानमा भएको खेलमा भिल्लारियलको जितमा परेजोसहित सर्जि कार्डन, थिएनो बेरीले गोल गरेका थिए। १ गोल आत्मघाती भएको थियो । सेल्टा भिगोकाबोर्जा लिग्लिसिया, ओस्कारला मिङ्गेजा र कार्ल स्टारफेल्टले गोल गरेका थिए ।
१२औं मिनेटमा लिग्लिसियाले गोल गर्दै सेल्टालाई अग्रता दिलाएका थिए । २६औं मिनेटमा कार्डनले गोल गर्दै भिल्लालाई बराबरीमा पुर्याएका थिए । ३१औं मिनेटमा मिङ्गेजाले गोल गर्दै सेल्टा भिगोलाई पुनः खेलमा अग्रता दिलाए।
६०औं मिनेटमा बेरीले गोल गर्दै भिल्लालाई खेलमा फर्काए । त्यसको ४ मिनेट पछि सेल्टाका जेल्सनको आत्मघाती गोलको भिल्लाले पुनः अग्रता लियो । ८०औं मिनेटमा स्टारफेल्टको गोलमा सेल्टा भिगोले खेलमा बराबरी गर्यो। इन्ज्युरी समयमा परेजोले गोल गर्दै भिल्लारियललाई जित दिलाए ।
३ खेलमा शतप्रतिशत नतिजाका साथ भिल्लारियल अंक तालिकाको शीर्ष स्थानमा उक्लेको छ । ६ अंकका साथ सेल्टा भिगो दोस्रो स्थानमा झरेको छ। ला लिगामा मंगलबार १ खेल हुनेछ। – एजेन्सी
Published Date: 27 August 2024
