काठमाडौं, असार २६ । साविक विजेता अर्जेन्टिना कोपा अमेरिका २०२४ को फाइनलमा प्रवेश गरेको छ । न्यू जर्सीमा बुधवार बिहान भएको पहिलो सेमिफाइनलका क्यानडा माथि २-० को जित हात पार्दै अर्जेन्टिनाले उपाधि रक्षा यात्रा कायम राखेको हो ।
अर्जेन्टिनाका लागि जुलियन अल्भारेज र लियोनेल मेस्सीले १-१ गोल गरे ।
जुलियन अल्भारेजले २३औं मिनेटमा गोल गर्दै अर्जेन्टिनालाई अग्रता दिलाएका थिए । रोड्रीगो डे पलको सुन्दर थ्रु-पासमा गोल गर्दै उनले अर्जेन्टिनालाई अग्रता दिलाएका थिए ।
अर्जेन्टिनाले दोस्रो गोलका लागि ५१औं मिनेटसम्म कुर्नु पर्यो । एन्जो फर्नान्डेजको प्रहार गोललाइन नजिकबाट लियोनेल मेस्सीले पोस्टतर्फ नै प्रहार गर्दै प्रतियोगितामा आफ्नो पहिलो गोल गरेका थिए ।
अर्जेन्टिनाले अब फाइनलमा कोलम्बिया र उरुग्वे बीचको दोस्रो सेमिफाइनलको विजेता विरुद्ध खेल्नेछ । दोस्रो सेमिफाइनल खेल भोलि हुनेछ । – एजेन्सी
Published Date: 10 July 2024
