भक्तपुर, वैशाख २ । भक्तपुरको मध्यपुर थिमिवासीले आज सिन्दूर जात्रा अर्थात सुथः सिया जात्रा मनाएका छन्। आज विहान विभिन्न टोलमा रहेको देवीदेवताहरुको खटसहितको सिन्दुरजात्रा मनाएका हुन्। नयाँ वर्षको भोलिपल्ट मध्यपुर थिमिमा सिन्दुरजात्रा मनाउने गरिन्छ।
सिन्दूर जात्रामा बालकदेखि वृद्धवृद्धासम्म सहभागी थिए। सिन्दुर जात्रा मध्यपुर ठिमीको सबैभन्दा ठूलो जात्रा हो। जात्रामा चोक, चौबाटो, घर र टोलमा पुग्दा घरका झ्याल, कौसी र छतबाट सिन्दुर छर्ने, फूल बर्साएर स्वागत गर्ने प्रचलन छ।
मध्यपुरथिमिको टोल टोलबाट विभिन्न देवताहरुको मूर्तिलाई खटमा बोकेर सिन्दुर खेल्दै पूजाआजा गरि यो जात्रा मनाईएको हो।जात्रामा ठिमी क्षेत्रबाट २३ तथा नगदेश, बोडे र टिगनीबाट ९ वटा गरी ३२ वटा खटसहित नगर परिक्रमा गर्ने परम्परा रहेका छ। यो जात्रा थिमिमा मात्र मनाइन्छ।
जात्रामा वेला एकअर्कामा सिन्दुर दलिन्छ भने हातहातमा बत्ति लिएर नाइके प्रधानको अनुमतिमा बालकुमारीको खट उचालेपछि जात्रालाई दिगुटोल स्थित देवता घर परिक्रमा गराइन्छ।
