काठमाडौं, फागुन २१ । बैंक तथा वित्तीय संस्थाले १ दिनमै नेपाल राष्ट्र बैंकमा सवा खर्ब रुपैयाँ निक्षेप राखेका छन् । बैंक तथा वित्तीय संस्थाले आइतबार मात्रै १ खर्ब २३ अर्ब ८० करोड रुपैयाँ निक्षेप राखेका हुन् ।
बैंकिङ प्रणालीमा अधिक तरलता भएपछि बैंक तथा वित्तीय संस्थाले धमाधम केन्द्रीय बैंकमा निक्षेप राख्न थालेका छन् । यही फागुन १ गतेबाट केन्द्रीय बैंकले स्थायी निक्षेप संकलन सुविधा कार्यान्वयनमा ल्याएको थियो । उक्त सुविधा ल्याएपछि हालसम्म बैंक तथा वित्तीय संस्थाले केन्द्रीय बैंकमा ४ खर्ब २१ अर्ब निक्षेप राखिसकेका छन् ।
बैंक तथा वित्तीय संस्थाले ३ प्रतिशत ब्याजदरमै उक्त निक्षेप जम्मा गरेका हुन् । स्थायी निक्षेप संकलन सुविधा अन्तर्गत बैंकहरुले लगानी गरेर आफूसँग बाँकी रहेको सबै रकम राष्ट्र बैंकमा राख्न सक्छन् । यसरी राखेको रकम ४ दिनसम्म झिक्न मिल्दैन ।
Published Date: 04 March 2024
