पोखरा, माघ १६ । चर्च ब्वाइज युनाइटेड क्लब आहा!रारा पोखरा गोल्डकप फुटबल प्रतियोगिताको सेमिफाइनलमा पुगेको छ । पोखरा रंगशालामा समिर तामाङको गोलमा नेपाल पुलिस क्लबलाई मंगलबार १-० ले हराउँदै ए डिभिजन लिग च्याम्पियन चर्च ब्वाइज अन्तिम चारमा पुगेको हो।
७३ औं मिनेटमा पुलिसका गोलकिपर शत्रुघन चौधरी र डिफेण्डर दिपेन्द्र विकबीच तालमेल नमिल्दा समिरले त्यसको फाइदा उठाउँदै गोल गरेका थिए। त्यहि गोल खेलको निर्णायक बन्यो।
गत वर्ष पनि सर्वाधिक ६ पटकको च्याम्पियनसिप पुलिस क्वाटरफाइनलमा चर्च ब्वाइजसँग २-१ ले पराजित भएको थियो। यसअघि थ्री स्टार क्लब, त्रिभुवन आर्मी क्लब र जावलाखेल युथ क्लब सेमिफाइनल पुगिसकेका छन् । चर्च ब्वाइजले माघ १८ गते आर्मीसँग सेमिफाइनल खेल्ने छ ।
पहिलो सेमिफाइनलमा बुधबार थ्री स्टार क्लब र जावलाखेलबीच हुनेछ । सहारा क्लब पोखराको आयोजना जारी प्रतियोगिताको विजेताले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ ।
