काठमाडौं, माघ ११ । प्रधानमन्त्री कप २०२४ अन्तर्गत मुलपानी क्रिकेट मैदानमा जारी खेलमा बागमती प्रदेशले सुदूरपश्चिम प्रदेशलाई २ सय ४८ रनको प्रतिस्पर्धात्मक लक्ष्य दिएको छ ।
टस हारेर ब्याटिङको निम्तो पाएको बागमतीले निर्धारित ५० ओभरमा ९ विकेट गुमाउँदै २ सय ४७ रन जोडेको हो । बागमतीका लागि ओपनर आशुतोष घिरैयाले उच्च लय कायम राख्दै अर्धशतक बनाए ।
आशुतोषले ६२ बलमा ६ चौका र ३ छक्कासहित ५४ रन जोडे । उनले कप्तान रित गौतमसँग दोस्रो विकेटका लागि ७६ रनको साझेदारी गरेका थिए । रितले ६१ बलमा ९ चौकासहित ४४ रन जोडे ।
बागमतीका इशान पाण्डे २, रविन जोशी २४, अशोक पौडेल ३१ विपिन आचार्य १२ रनमा आउट भए । सोनु देवकोटाले तल्लोक्रममा २० बलको सामना गर्दै २ चौका र २ छक्कासहित नटआउट २८ रनको योगदान दिए । प्रतिशले १-१ चौका र छक्कासहित १४ बलमा १७ रन जोडे ।
सुदूरपश्चिमका लागि नारायण जोशी र शेर मल्लले ३-३ विकेट लिए । विकास आग्रीले २ र मिलन बोहोराले १ विकेट हात पारे ।
यस खेलमा जित हासिल गर्ने टोलीले शीर्षस्थानको पुलिससँग अंक बराबरी गर्नेछ । सुदूरपश्चिमले ५ खेल र बागमतीले ७ खेलमा ८ अंक जोडेको छ ।
Published Date: 25 January 2024
