काठमाण्डौ, माघ ८ । कृषि विकास बैंकको ५६औँ वार्षिकोत्सव शनिवार सम्पन्न भएको छ । उपप्रधानमन्त्री तथा अर्थमन्त्री विष्णुप्रसाद पौडेलले कृषि क्षेत्रको अग्रणी बैंक कृषि विकास बैंक हुनुपर्ने बताएका छन् ।
बैंकको ५६औँ वार्षिकोत्सवको अवसरमा आयोजित कार्यक्रममा उनले भने, “पछिल्ला वर्षहरूमा कृषि क्षेत्रमा लगानी घट्न थालेको छ र अन्य व्यावसायिक क्षेत्रमा लगानी बढ्दै गएको छ, हामी कृषि विकास बैंकलाई कृषि क्षेत्रका अग्रणी बैंक देख्न चाहन्छौँ ।“बैंकको आर्थिक क्षमता र अवस्था हेरेर कर्मचारीको सेवा सुविधाका विषयमा बैंक प्रशासनले उपयुक्त निर्णय लिनुपर्ने अर्थमन्त्रीले स्पष्ट गरे ।” बैंकको प्रमुख कार्यकारी अधिकृतको जिम्मेवारी पेशागत क्षमता भएकालाई दिइने र बैङ्कलाई प्रतिस्पर्धी बैङ्कका रूपमा अगाडि बढाउन सरकारले सक्दो सहयोग र समन्वय गर्ने बताएका छन् ।
कार्यक्रममा नेपाल राष्ट्र बैंकका गभर्नर महाप्रसाद अधिकारीले बैंकले कृषि क्षेत्रमा लगानीमा ध्यान दिनुपर्ने बताए । कृषि क्षेत्रमा लक्षित लगानी मात्र नभई यस क्षेत्रमा तालिम दिने संस्था रुपमा बैंकले नेतृत्व लिनुपर्ने बताए ।
बैंकले २०६२ सालमा नेपाल राष्ट्र बैंकबाट वाणिज्य बैंकको इजाजतपत्र प्राप्त गरेको थियो जसमा ५१ प्रतिशत शेयर सरकारको र ४९ प्रतिशत सर्वसाधारणको रहेको थियो ।
