एनसेलको शेयर खरिद बिक्रीमा कहिँ न कहिँ गडबडी छ: प्रधानमन्त्री दाहाल

काठमाडौँ, पुस ३ । प्रधानमन्त्री पुष्पकमल दाहाल ‘प्रचण्ड’ ले एनसेलको शेयर खरिद बिक्री स्वभाविक नभएको बताएका छन । उनले राज्य व्यवस्था समितिको बैठकमा यस्तो बताएका हुन ।

बुधबार बसेको राज्य व्यवस्था समितिको बैठकमा प्रधानमन्त्री प्रचण्डले एनसेलको शेयर खरिद बिक्रीमा कहिँ न कहिँ गडबडी भएको बताएका छन ।

उनले भने ‘कहिँ न कहिँ गडबडी छ, यस बिषयमा उच्चस्तरीय समितिले काम गरिरहेको छ । यसमा कहिँ न कहिँ गलत छ भन्ने लागेकै हुनाले छानबिन समिति बनाइएको हो।’

‘मैले दुबईमा नै सुने र भोलिपल्ट नै फर्किए । त्यसपछि सञ्चार मन्त्रालय र प्राधिकरणलाई निर्देशन दिए । मुख्यसचिवलाई बोलाएर पनि नीति नियम अनुसार निर्देशन दिनुपर्‍यो भनेर मुख्यसचिवबाट बनाउन लगाएर निर्देशन जारी गरेको हो । सरकारको नेतृत्वको हैसियतले म एकदमै गम्भीर रूपमा पहल गरेको छु । योसँग सम्बन्धित नियामक निकाय तथा राजनीतिक नेतृत्वलाई समेत राखेर छलफल चलाए । यसले के प्रभाव पार्छ भनेर गहन अध्ययन गर्न जरुरी रहेको भनेर मंसिर २१ गतेको बैठकबाट टङ्कमणि शर्माको नेतृत्वमा छानबिन समिति गठन भइसकेको छ’ उनले भने ।