काठमाडौ, कार्तिक २३ । एसियन बैंकर्स एसोसिएसनको सम्मेलन राजधानीमा सुरु भएको छ । नेपाल बैंकर्स एसोसिएसन र एसियाली बैंकर्स एसोसिएसनको संयुक्त आयोजनामा भएको दुई दिने सम्मेलनमा सदस्य राष्ट्रका बैंकरहरुको सहभागिता रहेको छ ।
सम्मेलनको उद्घाटन गर्दै अर्थमन्त्री डा प्रकाशशरण महतले अन्तर्राष्ट्रिय बैंकरहरुलाई नेपालमा लगानी गर्न आग्रह गरे । विश्व बैंक र एसियाली विकास बैंकले नेपालमा लगानी गरेको बताउँदै उनले नेपालमा लगानीका लागि उपयुक्त वातावरण रहेको र जलविद्युत क्षेत्रमा प्रशस्त सम्भावना रहेको बताए ।
उनले कोभिड–१९ पछिको मुलुकको अर्थतन्त्रको पुनरुत्थान र दिगो विकासका लागि सम्मेलन फलदायी हुने विश्वास व्यक्त गरे ।
सो अवसरमा नेपाल राष्ट्र बैंकका गभर्नर महाप्रसाद अधिकारीले बैंकहरुलाई डिजिटलाइजेसनमा जोड दिँदै छोटो अवधिमा देशका बैंकहरुले प्रगति गरेको बताए । उनले बैंकमा लगानी बढाउन पनि आग्रह गरे ।
सम्मेलनको नारा ‘एशियन बैंकिङः रोडम्याप फर रिकभरी एण्ड सस्टेन्ड ग्रोथ’ रहेको छ ।
Published Date: 09 November 2023
