काठमाडौँ, असोज १० । नेपाल राष्ट्र बैंकले बैंकहरुलाई दैनिक २० किलो सुन आयात गर्न पाउने गरी निर्देशन जारी गरेको छ।
केन्द्रिय बैंकले यसअघि दैनिक १० किलो मात्रै सुन आयात गर्न पाउने व्यवस्था गरेकोमा बुधबारदेखि दैनिक २० किलो सुन ल्याउन पाउने व्यवस्था गरेको हो।
केन्द्रिय बैंकले कुनै महिना एक महिनामा सिमा ननाघ्ने गरी एकमुष्ट रुपमा समेत सुन आयात गर्न पाउने व्यवस्था गरेको छ तर महिना वितिसकेपछि दैनिक कोटाअनुसार आयात नभएको सुन अर्को महिना आयात गर्न नपाउने व्यवस्था गरेको छ।
चालु आर्थिक वर्षको पहिलो २ महिनामा बैंकहरुले २०० किलो सुन आयात गरेका छन्। गत वर्षको तुलनामा सुनको आयात झनै घटेको छ। राष्ट्र बैंकले राखेको कोटाभन्दा पनि सुन आयात कम भएको देखिन्छ।
