नयाँदिल्ली, भदौ १३ । भारतभरका घरपरिवारलाई राहत दिने उद्देश्यले केन्द्र सरकारले खाना पकाउने ग्यासमा २०० भारतीय रुपैयाँ कटौती गर्ने घोषणा गरेको छ ।
केन्द्रीय मन्त्रीपरिषद्को निर्णयबारे पत्रकारहरुलाई जानकारी दिँदै सूचना तथा प्रसारण मन्त्री अनुराग सिंह ठाकुरले यो निर्णय प्रधानमन्त्री नरेन्द्र मोदीले ओणम र रक्षाबन्धनमा देशका महिलाहरुलाई उपहार दिएको बताए । प्रधानमन्त्री नरेन्द्र मोदीको अध्यक्षतामा मन्त्रीपरिषद्को बैठक बसेको हो ।
आजबाट लागू हुने गरी १४.२ केजीको ग्यास सिलिण्डरको मूल्य देशभर २०० रुपैयाँले घट्ने भएको छ । उदाहरणका लागि दिल्लीमा यो निर्णयले १४.२ केजीको सिलिण्डरको मूल्य प्रतिसिलिण्डर एक हजार १०३ रुपैयाँबाट घटाएर ९०३ रुपैयाँमा झार्नेछ ।
यो कटौती उज्ज्वला परिवारलाई प्रति सिलिण्डर २०० रुपैयाँको विद्यमान लक्षित अनुदानको अतिरिक्त हो, त्यसैले यो कटौतीपछि उज्ज्वला लाभग्राहीका लागि दिल्लीमा प्रभावकारी मूल्य ७०३ भारु हुनेछ । करिब ९.६ करोड उज्ज्वला लाभग्राहीसहित ३१ करोडभन्दा बढी घरेलु एलपीजी उपभोक्ताहरु छन् ।
