काठमाडौं, भदौ १३ । बागमती प्रदेशसभा सचिवालयले बागमती प्रदेशसभाको बैठक भदौ १८ गते बोलाइएको जनाएको छ ।
सचिवालयका मुख्य सचिव कृष्णहरि खड्काले कार्य सल्लाहकार समितिको बैठक बिहान ११ः३० बजे बस्ने र दिउँसो बस्ने संसद बैठकको एजेण्डा तयार गर्ने जानकारी दिए ।
असार ६ गते बसेको प्रदेशसभा बैठकमा सरकारका दुई फरक विधेयक पारित भएपछि प्रदेशसभाका सभामुख भुवनकुमार पाठकले अर्को सूचना नभएसम्मका लागि बैठक स्थगित गरेका हुन् ।
प्रदेश सभा सचिवालयले सो दिन बस्ने प्रदेश सभाका सदस्यहरुलाई बैठकमा उपस्थित हुन जानकारी गराइसकेको छ । त्यस्तै प्रदेश सरकारका तर्फबाट आज बागमती प्रदेशसभा सचिवालयमा नयाँ विधेयक दर्ता भएको छ ।
प्रदेश सभा सचिवालयमा दर्ता भएको विधेयक विज्ञान प्रवृत्ति, नवप्रवर्तन तथा विकास कोष सञ्चालन गर्न बनेको विधेयक, २०८० रहेको प्रदेश सभा सचिवालयका प्रवक्ता मनोजकुमार गुप्ताले जानकारी दिए ।
Published Date: 30 August 2023
